Pigion - Medi 2023

Cyfarfu aelodau o Gorff Llywodraethol yr Eglwys yng Nghymru yng Nghanolfan Gynadledda Ryngwladol Cymru yng Nghasnewydd ar 5-6 Medi. Cafodd y cyfarfod ei ffrydio’n fyw a gallwch weld recordiad o bob sesiwn, ynghyd â chrynodeb byr, isod.

Lawrlwytho’r holl adroddiadau yma

Cliciwch ar y Sesiwn

Diwrnod Un - 5 Medi

Cymun Bendigaid

Sesiwn Un

• Croeso i ymwelwyr
• Anerchiad Llywyddol

Sesiwn Dau

• Hawl i Holi

Sesiwn Tri

• Blaenoriaethau, Twf a Chydnerthedd

Sesiwn Pedwar

• Bil i ddiwygio Coleg Etholiadol yr Archesgob a Cholegau Ethol Esgobion
• Diwygiad i Reoliadau Pennod V

Diwrnod Dau - 6 Medi

Sesiwn Pump

• Gweddïau Agoriadol
• Trafodaeth lawn yn dilyn grwpiau trafod

Sesiwn Chwech

• Ardaloedd Gweinidogaeth fel Sefydliadau Corfforedig Elusennol
• Cynnig Aelod Preifat
• Fideo Cysylltiadau Eciwmenaidd a chwestiynau

Sesiwn Saith

• Adroddiad y Pwyllgor Sefydlog
• Adroddiad y Pwyllgor Sefydlog ar Faterion Cyfreithiol a Llywodraethu
• Ffarwelio
• Siars y Llywydd
• Dyddiad a lleoliad y cyfarfod nesaf

Addoliad

Cafodd yr addoliad ei gydlynu gan y Parch James Tout.

Cynhaliwyd Ewcharist Sanctaidd a Hwyrol Weddi ddydd Mawrth a chynhaliwyd Gweddïau Agored ddydd Mercher yn yr ystafell gynadledda.

Croeso i ymwelwyr

Estynnodd yr Archesgob groeso i wahoddedigion a chynrychiolwyr o eglwysi eraill. Roedd y rhain yn cynnwys y Parch Siôn Brynach, prif weithredwr Cytûn, y Parch Andrew Charlesworth, cadeirydd Synod Cymru yr Eglwys Fethodistaidd, y Parch Brian Matthews o Eglwys Bresbyteraidd Cymru, Sheran Harper, Llywydd Byd-eang Undeb y Mamau a Jennie Weaver, swyddog ymgysylltu a chodi arian gyda Cymorth Cristnogol Cymru.

Anerchiad Llywyddol

Anogodd yr Archesgob yr esgobaethau i “dorri tir newydd” gyda’u cynlluniau ar gyfer efengylu, gan ddefnyddio’r cyllid newydd a ddarparwyd gan Gorff y Cynrychiolwyr.

Dywedodd y gallai fod yna “fynegiant eang” i’r ffyrdd o wario’r arian, ond byddai’n rhaid i bob cais gadw’r “cymeriad hanfodol hwnnw o dystiolaethu i’r newyddion da yn Iesu Grist.”

Ychwanegodd y byddai “ecoleg gymysg o allgymorth” yn darparu platfform mwy sylweddol i rannu gobaith ledled Cymru, a allai gynnwys mentrau o Ardaloedd Gweinidogaeth, cyfleoedd trwy fedyddiadau, angladdau neu briodasau, prosiectau arloesol neu hyd yn oed cyfleoedd i blannu eglwysi.

Cymharodd yr Archesgob Andrew hyn gyda stori Nehemeia a gynlluniodd i ailadeiladu waliau Jerwsalem.

Dywedodd fod angen strategaeth recriwtio ar lefel y dalaith i ddod o hyd i bobl newydd i ymuno â’r Eglwys.

Dywedodd hefyd fod angen llawer iawn o gymorth ar y gweithlu cyfredol mewn Ardaloedd Cenhadaeth a Gweinidogaeth i gynnal “meddylfryd gwydn a chenhadol” mewn amgylchedd heriol.

Canmolodd waith y Grŵp Blaenoriaethau Gweithredol a oedd yn adolygu strwythur llywodraethu canolog yr Eglwys ac yn ceisio nodi ffactorau gweinidogol allweddol sy’n galluogi Ardaloedd Gweinidogaeth i ffynnu.

Yn y cyfamser, roedd y Gymuned Ddysgu Esgobaethol/y Dalaith yn esiampl o’r “diwylliant newydd o gefnogaeth y naill i’r llall ar draws yr esgobaethau.” Bydd y grŵp, sy’n cyfarfod am y tro cyntaf ym mis Hydref, yn dwyn ynghyd enghreifftiau o bob cwr o’r dalaith mewn ymarfer gwrando a dysgu i rannu arferion gorau.

Cyhoeddodd yr Archesgob hefyd y byddai uwchgynhadledd hinsawdd Cymru gyfan yn cael ei chynnal gan yr Eglwys yng Nghymru y flwyddyn nesaf, gan ganolbwyntio ar ddyfrffyrdd a thirwedd Cymru.

Bydd y digwyddiad dau ddiwrnod yn dod ag academyddion, ymgyrchwyr, grwpiau pwysau a rhanddeiliaid ynghyd i drafod effaith diwydiant, amaethyddiaeth a chartrefi ar yr amgylchedd.

Roedd gan Gymru, meddai, “gyfle i ailgynllunio ein hymagwedd at ynni, dŵr, defnydd tir a chynaladwyedd cyflenwad bwyd ac ar lefel leol” ac roedd yr Eglwys yng Nghymru mewn sefyllfa dda i ddod â phobl ynghyd mewn “sgwrs dda a phartneriaeth”.

Cyfeiriodd yr Archesgob Andrew at daith yr Eglwys ei hun tuag at garbon sero net a oedd wedi gwneud cynnydd cynnar da. Apeliodd ar i’r eglwysi ddefnyddio’r Pecyn Ôl-troed Ynni, gan eu herio i’w gwblhau erbyn y Nadolig.

• Darllenwch yr anerchiad yn llawn yma: Anerchiad Llywyddol

Cafodd aelodau gyfle i ymateb i’r anerchiad.

>Yn ôl i'r brig

Adroddiad Mainc yr Esgobion

Cyflwynodd Esgob Mynwy, Cherry Vann, yr adroddiad ar ran Mainc yr Esgobion.

Rhoddodd grynodeb o’r adroddiad a sylwadau ar ei brif feysydd, cyn gwahodd unrhyw aelod o’r Corff Llywodraethol i ofyn unrhyw gwestiynau a oedd ganddynt neu roi sylwadau ar unrhyw ran o’r Adroddiad.

Holodd Tony Mullins, aelod lleyg etholedig dros Esgobaeth Llandaf, am ofalu am ffabrig eglwysi. Dywedodd fod gwirfoddolwyr dan bwysau yn sgil pryderon am gynnal a chadw adeiladau.

Dywedodd yr Esgob Cherry fod y Fainc yn bryderus a’u bod nhw a staff Corff y Cynrychiolwyr yn edrych yn ofalus ar beth roedd yr Eglwys ei angen gan adeiladau yn y dyfodol.

Ni chafwyd mwy o gwestiynau na sylwadau gan yr aelodau.

Adroddiad a chyfrifon Corff y Cynrychiolwyr

Wrth gyflwyno’r adroddiad, dywedodd yr Athro Medwin Hughes, cadeirydd Corff y Cynrychiolwyr, fod 2022 wedi bod yn flwyddyn gyffrous ar gyfer gwneud penderfyniadau ar gyfeiriad yr Eglwys i’r dyfodol. Ond roedd hefyd wedi bod yn flwyddyn drychinebus i’r marchnadoedd ariannol. Sicrhaodd yr aelodau fod y Corff yn cadw llygad manwl ar y cronfeydd ac nad cynllunio oedd ei waith ond gwasanaethu a chefnogi’r Eglwys a sicrhau bod yna ddigon o arian i ddatblygu a bwrw ymlaen â’i chynlluniau cyffrous.

O ran yr Adolygiad o Dâl Clerigion, cydnabu’r Athro Hughes bod y gwaith yn cymryd llawer o amser, ond roedd hi’n bwysig ei gael yn iawn. Gofynnwyd am gyngor gan arbenigwyr pensiwn a’r gobaith oedd y byddai’r gwaith yn cael ei ddatblygu dros yr ychydig fisoedd nesaf.

Pasiwyd y cynnig i gymeradwyo’r adroddiad.

Adroddiad Prifysgol Cymru y Drindod Dewi Sant

Ar ôl bod yn y swydd am ddiwrnod yn unig, cymeradwyodd yr Is-ganghellor newydd, yr Athro Elwen Evans KC, adroddiad Prifysgol Cymru y Drindod Dewi Sant i’r aelodau. Dywedodd ei fod yn dangos ymrwymiad llwyr y brifysgol i’w thraddodiad Cristnogol ac i’r Eglwys yng Nghymru – o’i gwreiddiau dros 200 mlynedd yn ôl fel Coleg Dewi Sant, i’w chysylltiadau agos ag Athrofa Padarn Sant heddiw – talodd yr Athro Evans deyrnged i’w rhagflaenydd, yr Athro Medwin Hughes, hefyd.

>Yn ôl i'r brig

Blaenoriaethau, Twf a Chydnerthedd

Cafodd yr aelodau ddiweddariad ar feysydd gwaith penodol yn ymwneud â’r cynllun 10 mlynedd, cyn rhannu’n grwpiau i’w trafod. Disgrifiodd Tim Llewelyn, cadeirydd y Pwyllgor Sefydlog, y Gweithgor Blaenoriaethau, amlinellodd yr Archesgob gynnydd Grŵp Dyrannu Cronfa Twf yr Eglwys, adroddodd yr Athro Medwin Hughes ar y Gweithgor Dosbarthu Cyllid a gwahoddodd y Dr Heather Payne drafodaeth ar fformat cyfarfodydd y Corff Llywodraethol yn y dyfodol. Bu’r grwpiau’n ystyried y cwestiynau canlynol am dros awr:

1. Pan ymunoch chi â’r Corff Llywodraethol i ddechrau, beth oeddech chi’n ei ddisgwyl a pha mor agos yw’r realiti i’r disgwyliad hwnnw?
2. Beth ddylen ni ddechrau ei wneud, rhoi’r gorau i’w wneud a pharhau i’w wneud yn y Corff Llywodraethol?
3. Beth yw’ch ymateb i’r blaenoriaethau ar gyfer yr Eglwys yng Nghymru fel y’u nodwyd gan yr Archesgob?
4. Beth yw’r ffordd orau i Gorff y Cynrychiolwyr a’r Esgobaeth gefnogi cenhadaeth a gweinidogaeth yn eich ardal leol?
5. Beth sy’n ein hatal ni rhag tyfu?
6. Pe baech chi’n cael sgwrs un-i-un gyda’r Archesgob, beth fyddech chi’n ei ddweud wrtho?

>Yn ôl i'r brig

Bil i ddiwygio Coleg Etholiadol yr Archesgob a Cholegau Ethol Esgobion

Roedd gofyn i’r Corff Llywodraethol fynd i gam pwyllgor er mwyn trafod y Bil cyn pleidleisio arno. Penodwyd y Barnwr Andrew Keyser, KC, yn gadeirydd y pwyllgor a gwahoddodd Moira Randall, cadeirydd y Pwyllgor Dethol, i gyflwyno ei adroddiad ac amlinellu ei argymhellion. Esboniodd fod y Bil yn gam olaf mewn proses hir. Yn ystod y blynyddoedd diwethaf cafwyd tri adroddiad gan ddau weithgor ar y materion hyn, yn ogystal â dwy ddadl o sylwedd yn y Corff Llywodraethol a llawer o drafod yn y Pwyllgor Sefydlog. Roedd y Bil a ddeilliodd yn y pen draw o’r adroddiadau a’r dadleuon hyn yn cynnwys cynigion a oedd eisoes wedi bod yn destun llawer o ddadlau a chraffu. O ganlyniad, bu’r Pwyllgor Dethol yn ymdrin â nifer fach o fân ddiwygiadau a gynigiwyd, a chafodd pump ohonynt eu mabwysiadu gan y Corff Llywodraethol. Cynigiwyd un diwygiad na chafodd ei argymell, ac ni chafodd ei fabwysiadu gan y Corff Llywodraethol yn y cam pwyllgor.

Ar ddiwedd y cam pwyllgor, cafodd y Bil ei gynnig gan Archddiacon Tyddewi, Paul Mackness, a’i eilio gan Archddiacon Llandaf, Rod Green. Pasiwyd y Bil gan fwy na dau draean yn y tair urdd a’i gyhoeddi gan y Llywydd.

Diwygiad i Reoliadau Pennod V

Cyflwynodd Esgob Llandaf ddiwygiad i helpu Cynadleddau Esgobaethol i lenwi “swyddi gwag achlysurol” ar y rhestr o etholwyr esgobol a’r rhestr atodol i’w bwyllgor sefydlog. Byddai’r diwygiad yn golygu bod modd penodi pobl rhwng etholiadau ffurfiol. Pwysleisiodd Esgob Gregory nad oedd rheidrwydd ar unrhyw esgobaeth i wneud hyn, ond roedd yn system gwerth chweil a oedd wedi bod yn gweithio’n dda i’w esgobaeth ef ac roedd yn dymuno gallu parhau i’w defnyddio.

Mynegodd Hannah Rowan (cyfetholwyd gan Mynwy) ei phryder y byddai’r diwygiad yn rhoi mwy o bŵer a dylanwad i nifer fach o bobl. Dadleuodd fod modd galw Cyfarfod Cyffredinol Brys ar-lein yn sydyn bellach. “Gadewch i ni beidio ag ildio ein democratiaeth yn rhy hawdd,” meddai.

Amddiffynnodd y Canon Ddr Jason Bray (Llanelwy) ac is-lywydd etholedig Pwyllgor Sefydlog Esgobaeth Llanelwy, y diwygiad, gan ddweud y byddai’n “ganiataol ac nid rhagnodol” ac yn caniatáu mwy o hyblygrwydd.

Wrth ymateb, sicrhaodd yr Esgob Gregory yr aelodau bod llenwi swyddi gwag yn y ffordd hon yn “bosibilrwydd anfynych iawn yn wir” a bod pawb am fod mor ddemocrataidd â phosibl.

Pasiwyd y cynnig.

Cynnig:

Ym Mhennod V (Rheoliadau) ail-rifo Rheoliad 4.5 fel 4.6 a mewnosod:

• 4.5 Gall Cynhadledd Esgobaethol wneud darpariaeth i ddirprwyo etholiadau i lenwi swyddi gwag achlysurol ar y rhestr o Etholwyr Esgobol a’r rhestr atodol i’w Bwyllgor Sefydlog. Bydd etholiadau o’r fath yn bwrw ymlaen fel arall fel y nodir yn Rheoliad 4.4

>Yn ôl i'r brig

Gweddïau Agoriadol

Arweiniwyd y gweddïau a rhoddwyd yr anerchiad gan Sheran Harper, Llywydd Byd-eang Undeb y Mamau. Roedd ei hanerchiad teimladwy yn canolbwyntio ar drais yn y cartref, ym Mhrydain a thramor. Diolchodd i’r aelodau am eu gweddïau a’u partneriaeth yn y rhaglen Restored a gofynnodd am eu cymorth ar gyfer yr ymgyrch ryngwladol ym mis Tachwedd – 16 Days of Activism Against Gender Violence.

“Gyda’n gilydd, mae’n rhaid i ni symud yr agenda ymlaen i ddarparu lle diogel lle mae pob menyw a phlentyn yn cael eu caru, eu gwerthfawrogi, eu parchu ac yn cael cyfle i ffynnu,” meddai.

Trafodaeth lawn yn dilyn grwpiau trafod

Diolchodd Simon Lloyd, Ysgrifennydd y Dalaith, i hwyluswyr a chofnodwyr pob grŵp trafod o’r diwrnod cynt ar Flaenoriaethau, Twf a Chydnerthedd. Rhoddodd grynodeb o’r adborth i bob cwestiwn.

O ran y Corff Llywodraethol, roedd y sylwadau yn gadarnhaol ar y cyfan. Roedd pobl yn hoffi’r teimlad o fod yn deulu, yn falch bod y cyfarfodydd yn llai ffurfiol nag yn y gorffennol ac yn gwerthfawrogi gallu eistedd o amgylch byrddau yn lle mewn rhesi. Cafwyd sylwadau bod sgiliau anghytuno a gwrando’n astud ar ei gilydd aelodau wedi gwella.

Roedd yr awgrymiadau ar gyfer newid yn cynnwys derbyn adroddiadau heb gynigion ac i aelodau beidio ag ailadrodd pethau. Roedd yna alwadau hefyd am fwy o weddi ac y dylai fod yn fwy radical.

Roedd yr ymatebion i’r blaenoriaethau a bennwyd gan yr Archesgob yn cynnwys ymdeimlad nad oeddynt yn ddigon heriol a’u bod yn swnio fel datganiadau gwerth ac nid blaenoriaethau. Roedd dymuniad i weld mwy o gyfeiriad at Dduw a defnydd o iaith genhadu ac efengylu glir.

Roedd awgrymiadau am gymorth ar gyfer cenhadaeth a gweinidogaeth gan Gorff y Cynrychiolwyr a’r Esgobaethau yn cynnwys cyllid i weinyddwyr Ardaloedd Cenhadaeth a Gweinidogaeth a gweithwyr cyflogedig fel y gallent ryddhau clerigion i genhadu gan y dylai “offeiriaid fod yn offeiriaid”. Galwyd am fwy o glerigion hefyd ac i brosesau ymgeisio am grantiau fod yn haws.

Roedd y ffaith bod gan glerigion ormod i’w wneud yn un o’r rhesymau dros atal twf yr eglwys. Roedd hynny’n cynnwys gofalu am adeiladau a phethau eraill a oedd yn tynnu eu sylw ac yn dwyn eu hamser rhag medru bod yn offeiriaid. Roedd teimlad hefyd fod yna ddiffyg hyder i ddatgan newyddion da yr Efengyl a gwybodaeth o’r Efengyl.

Roedd negeseuon i’r Archesgob yn cynnwys canmoliaeth a diolch am ei Anerchiad fel Llywydd a negeseuon o sicrwydd fod ganddo’r gefnogaeth angenrheidiol. Roedd dymuniad iddo ganolbwyntio ar adeiladu’r Deyrnas, nid gwasanaethu’r sefydliad, i roi’r gorau i ail-frandio ac i addasu mewn byd sy’n newid.

Ymatebodd nifer o’r aelodau i’r adborth gan Mr Lloyd gyda sylwadau pellach. Dywedodd cadeirydd y sesiwn, Archddiacon Tyddewi, Paul Mackness, fod yr holl sylwadau wedi’u nodi ac y byddent yn cael eu hadrodd yn ôl i’r Pwyllgor Sefydlog fel rhan o’r drafodaeth ehangach.

>Yn ôl i'r brig

Ardaloedd Gweinidogaeth fel Sefydliadau Corfforedig Elusennol

Cafodd y cynnig i alluogi Ardaloedd Gweinidogaeth/Cenhadaeth i ffurfio fel Sefydliadau Corfforedig Elusennol ei gynnig yn gyntaf fel Cynnig Aelod Preifat ddwy flynedd yn ôl gan Archddiacon Margam, Mike Komor. Er na phasiwyd y cynnig bryd hynny, roedd y drafodaeth yn dangos yn glir bod awydd am y newid, yn dilyn gwaith pellach ar y cynigion.

Esboniodd Matthew Chinery, y pennaeth gwasanaethau cyfreithiol, fod y gwaith wedi’i wneud bellach a bod templed cymeradwy wedi’i baratoi i Ardaloedd Gweinidogaeth/Cenhadaeth ei ddefnyddio i sefydlu Sefydliad Corfforedig Elusennol. Er bod yr holl Ardaloedd hyn yn elusennau, roedd hyn yn ymwneud â symud i fath gwahanol o elusen a fyddai’n cynnig buddion i ymddiriedolwyr. Roedd pob Sefydliad Corfforedig Elusennol yn derbyn rhif elusen gofrestredig, ac roedd hynny’n hwyluso’r broses o hawlio buddion.

Pleidleisiodd yr aelodau o blaid y cynnig i ddiwygio Pennod IV (C) 12, gan alluogi Ardaloedd Gweinidogaeth/Cenhadaeth i ffurfio Sefydliadau Corfforedig Elusennol, ar ôl ymgynghori â’u Harchddiacon.

Bydd canllawiau pellach ar y weithdrefn yn cael eu cyhoeddi’n fuan.

Cynnig Aelod Preifat

Cafodd cynnig i sefydlu comisiwn annibynnol i archwilio Ardaloedd Gweinidogaeth/Cenhadaeth, a hwythau wedi’u comisiynu’n ffurfiol ledled Cymru bellach, ei gynnig gan y Parch Ddr Jonathon Wright a’i eilio gan y Parch Sam Aldred, y ddau o Esgobaeth Abertawe ac Aberhonddu.

Cyflwynwyd diwygiad gan y Parch James Henley (Mynwy). Er ei fod yn cytuno bod gwerthuso’n bwysig a’n bod ni’n dysgu’r gwersi yr oedd angen i ni eu dysgu, roedd yn dadlau y byddai comisiwn o’r fath yn wastraff amser ac yn gostus. “Allwn ni ddim mynd ati i gontractio’n allanol ein cydgyfrifoldeb i werthuso a dirnad,” meddai. “Mae’n rhaid i ni berchnogi hynny ein hunain.”

Pasiwyd y cynnig diwygiedig.

Cynnig

Mae bron 12 mlynedd wedi pasio ers cynhadledd ‘Nawr yw’r Amser’ yn Llandudno, lle cafodd Golwg 2020 ei lansio. Nod Golwg 2020 oedd trawsnewid yr Eglwys yng Nghymru, yn rhannol, drwy fabwysiadu Ardaloedd Gweinidogaeth/Cenhadaeth ym mhob esgobaeth yn y Dalaith.

Ers mis Mehefin 2023, mae pob esgobaeth wedi comisiynu’n ffurfiol Ardaloedd Gweinidogaeth/Cenhadaeth, gan ddisodli’r system plwyfi fel yr uned weinyddol leol sylfaenol. Mae Ardaloedd Gweinidogaeth/Cenhadaeth yn nodi newid sylfaenol yn strwythur yr Eglwys yng Nghymru. Mae ganddynt oblygiadau hirdymor sy’n newid neu’n cael effaith sylweddol ar lywodraethu, cyllid, cenhadaeth a gweinidogaeth.

Mae’r Corff Llywodraethol hwn:

a) yn cymeradwyo hunanwerthuso o fewn esgobaethau a rhannu arfer da ar draws y Dalaith;

b) yn croesawu camau’r Archesgob i sefydlu Cymuned Ddysgu i helpu ein myfyrdod;

c) yn cyfeirio’r Pwyllgor Sefydlog, yn dilyn cyfarfod cyntaf y Gymuned Ddysgu yr hydref hwn, i ddatblygu cynigion i ehangu ac ymsefydlu dulliau cadarn o hunanwerthuso mewn esgobaethau ac o gydweithio ar draws y dalaith.

Fideo Cysylltiadau Eciwmenaidd a chwestiynau

Cyflwynodd Esgob Llanelwy y cynnig, gan bwysleisio ei fod yn ymwneud â’n cymdeithas â Christnogion ledled y byd a’r rhan rydym yn ei chwarae mewn eciwmeniaeth ryngwladol. Roedd hynny’n amserol, meddai, ar ôl i Gyngor Eglwysi’r Byd gyfarfod y llynedd ac i Gynhadledd yr Eglwysi Ewropeaidd gwrdd eleni, gyda’r ddau yn cynnwys cynrychiolwyr o’r Eglwys yng Nghymru.

Cafodd y cynnig ei eilio gan Ddeon Tyddewi, Sarah Rowland Jones. Cafodd diwygiad, a awgrymwyd gan y Parch Mark Thomas (Abertawe ac Aberhonddu), i ychwanegu pedwerydd cymal ei dderbyn gan yr Esgob Gregory. Yna, pasiwyd y cynnig gan yr aelodau.

Cynnig

Bod y Corff Llywodraethol:

a) yn croesawu ymwneud yr Eglwys yng Nghymru â’r gwahanol offerynnau eciwmenaidd rhyngwladol;

b) yn diolch i bawb sy’n gweithio’n galed i sicrhau cynrychiolaeth gref o’n bywyd a’n cenhadaeth ar y lefel ryngwladol;

c) yn cadarnhau ymrwymiad yr Eglwys yng Nghymru i’r mudiad eciwmenaidd byd-eang fel rhan o ewyllys Duw ar gyfer tystiolaeth unedig i’r Efengyl

d) yn archwilio ffyrdd o gefnogi a gweddïo dros yr eglwys sy’n cael ei herlid ledled y byd.

>Yn ôl i'r brig

Adroddiad y Pwyllgor Sefydlog

Cyflwynwyd yr adroddiad gan Tim Llewelyn, cadeirydd y Pwyllgor Sefydlog. Argymhellwyd bod y Corff Llywodraethol yn cyfarfod ym Mhrifysgol Cymru y Drindod Dewi Sant ar 4-5 Medi 2024 ac yn Venue Cymru, Llandudno, ar 30 Ebrill-1 Mai 2025. Pasiwyd hyn a chymeradwywyd yr adroddiad.

Adroddiad y Pwyllgor Sefydlog ar Faterion Cyfreithiol a Llywodraethu

Cafodd mân ddiwygiadau cyfansoddiadol eu cynnig nad oedd yn gofyn am weithdrefn Bil. Roedd y rhain yn cynnwys: newidiadau golygyddol i ddisodli iaith rywiaethol gydag iaith niwtral o ran rhywedd; ymestyn y dyddiad cau i gynadleddau cyfarfodydd festri a deoniaeth er mwyn rhoi mwy o amser i drysoryddion baratoi cyfrifon; ac aildrefnu Canonau a oedd yn ymwneud â chysylltiadau ag eglwysi eraill.

Cymeradwywyd yr adroddiad.

Ffarwelio

Talodd yr Archesgob Andrew deyrnged i ddau aelod a oedd yn ymddeol - yr Esgob Joanna Penberthy, Esgob Tyddewi tan ddiwedd mis Gorffennaf, a Mike Komor, Archddiacon Margam ers 2018. Dymunodd ymddeoliad hapus i’r ddau.

Siars y Llywydd

Daeth y cyfarfod i ben gyda siars gan yr Archesgob Andrew. Roedd aelodau, meddai, wedi ymgodymu’n ddyfal â’i gilydd i ddeall ewyllys Duw a dirnad beth yr oedd Ef yn ein galw i’w wneud. Anogodd yr aelodau i fod yn “llunwyr naratifau ac agendâu a rannwn â’n gilydd yn y cymundeb”, ac i raeadru hyn i eraill. Dylent hefyd ddwyn i ystyriaeth ein hoes a’n hamseroedd a gwrando beth mae Duw yn ei wneud yn y byd hwn.

Dyddiad a lleoliad y cyfarfod nesaf

Bydd y Corff Llywodraethol yn dychwelyd i Ganolfan Gynadledda Ryngwladol Cymru yn ei gyfarfod nesaf ar 17-18 Ebrill.

>Yn ôl i'r brig