Gweinidogaeth leyg gomisiynedig

Mae’r Eglwys yng Nghymru yn cadarnhau ffurfiau ar weinidogaethau lleyg cyhoeddus achrededig, neu weinidogaethau comisiynedig. Ar hyn o bryd, mae tri math o weinidogaeth gomisiynedig:

• Arweinydd Addoliad
• Cynorthwy-ydd Bugeiliol
• Categydd

Mae galwad unigolion i’r gweinidogaethau hyn yn cael ei ddirnad yn lleol, yn yr ardal weinidogaeth/genhadaeth, ac mae’r hyfforddiant a’r gofynion ar gyfer y rolau hyn yn amrywio o un esgobaeth i’r llall. Y cam cyntaf felly yw siarad ag arweinydd eich eglwys neu gaplan am eich ymdeimlad o’ch galwad, a fydd yn eich helpu i bwyso a mesur y cyfleoedd gwahanol sydd ar gael yn eich esgobaeth benodol chi. Dyma fydd dechrau eich taith ddirnad, lle gallwch weld a ydy’r weinidogaeth gomisiynedig yn addas i chi, ac a ydych chi’n addas ar gyfer gweinidogaeth gomisiynedig.

Mae Arweinwyr Addoliad yn weinidogion lleyg comisiynedig sy’n cynorthwyo gweinidogion trwyddedig ac ordeiniedig i arwain gwasanaethau addoliad. Gallai eu gwaith gynnwys:

• arwain gwasanaethau boreol a hwyrol weddi
• cynorthwyo gyda Gweinidogaeth y Gair pan fo’r Cymun yn cael ei weinyddu
• arwain Gwasanaethau’r Gair, o fewn a thu allan i’r eglwys, pan na fydd pregeth neu Gymun
• arwain yr ymbiliau neu alluogi eraill i wneud hynny
• annog yr Eglwys i ddatblygu creadigrwydd ac arfer da o ran ei litwrgi a’i haddoliad

Am ragor o wybodaeth, mae taflen am arweinwyr addoliad ar gael yma:

• Gweinidogaeth Gomisiynedig yn yr Eglwys yng Nghymru – Arweinydd Addoliad (PDF)

Mae Cynorthwywyr Bugeiliol yn weinidogion lleyg comisiynedig sy’n cefnogi gweinidogion ordeiniedig i ddangos cariad tebyg i Grist a chonsyrn tuag at eraill trwy ofal bugeiliol o fewn a thu allan i’r eglwys. Mae eu gwaith yn cynnwys:

• bod gyda’r claf a’r dioddefus, gwrando arnynt a gweddïo drostynt
• ymweld â’r cleifion a’r rhai sy’n gaeth i’w cartrefi ar ran yr eglwys
• ymgymryd â dirnadaeth a hyfforddiant ychwanegol ar gyfer arbenigeddau ychwanegol megis priodasau, bedyddiadau, gweinidogaeth galar, gweinidogaeth Ewcaristig, neu weinidogaeth gweddïo ac iachau

Am ragor o wybodaeth, mae taflen am gynorthwywyr bugeiliol ar gael yma:

• Gweinidogaeth Gomisiynedig yn yr Eglwys yng Nghymru – Cynorthwy-ydd Bugeiliol (PDF)

Gweinidogion lleyg comisiynedig yw categyddion sy’n cynorthwyo gweinidogion ordeiniedig i helpu pobl i ddyfnhau eu ffydd trwy ddysgu a galluogi astudio o fewn yr eglwys leol. Mae eu gwaith yn cynnwys:

• annog yr eglwys i dyfu mewn gwybodaeth, ffydd a disgyblaeth trwy astudio a myfyrio
• galluogi eraill i archwilio eu credoau drostynt eu hunain
• arwain mewn modd a fydd yn hwyluso grwpiau astudio ar gyfer rhaglenni a chyrsiau ar fod yn ddisgyblion
• cynorthwyo i baratoi ymgeiswyr ar gyfer bedydd a chonffyrmasiwn

Am ragor o wybodaeth, mae taflen am gategyddion ar gael yma:

Gweinidogaeth Gomisiynedig yn yr Eglwys yng Nghymru – Categydd (PDF)