Gweinidogaeth leyg drwyddedig

Mae Gweinidogion Lleyg Trwyddedig yn cael eu trwyddedu gan esgobion yr Eglwys yng Nghymru ar gyfer gweinidogaeth gyhoeddus gynrychiadol. Maen nhw’n chwarae rôl hollbwysig ym mywyd yr Eglwys yng Nghymru, gan wasanaethu ochr yn ochr â chlerigion i feithrin ffydd a hwyluso cenhadaeth. Lleygion yw’r rhain sydd wedi’u hyfforddi a’u trwyddedu gan yr esgob i gyflawni eu gweinidogaeth. Mae’r rhan fwyaf o weinidogion lleyg trwyddedig yn cael eu galw’n Ddarllenwyr, er bod rhai yn cael eu trwyddedu i weinidogaethau penodol eraill, megis efengylu, caplaniaeth neu weinidogaethau plant, ieuenctid a theuluoedd.

Mae gwaith gweinidogion lleyg trwyddedig yn amrywio o un gymuned i’r llall, gan adlewyrchu gwahanol anghenion lleol. Mae llawer o weinidogion lleyg trwyddedig yn ymwneud ag addysgu, pregethu, arwain addoliad a chefnogi cenhadaeth. Gyda hyfforddiant ychwanegol, mae rhai gweinidogion lleyg trwyddedig yn cynnal gwasanaethau angladdol hefyd.

Yn aml, mae gweinidogaeth leyg drwyddedig yn digwydd ar y cyd â gwaith ac ymrwymiadau eraill, gan gynnig cyfle unigryw i rannu cariad Crist yn yr eglwys ac ym mywyd bob dydd yr unigolyn.

Cyn dod yn Weinidog Lleyg Trwyddedig, byddwch yn cymryd rhan mewn proses o ddirnad i archwilio galwad Duw yn eich bywyd. Cam cyntaf dirnad i’r Weinyddiaeth Leyg Drwyddedig yw siarad ag arweinydd eich eglwys neu gaplan am eich ymdeimlad o’ch galwad. Byddant yn gweithio gyda chi ac yn trefnu cyfarfod gyda thîm galwedigaethau yr esgobaeth, a fydd yn eich tywys drwy’r broses.

Bydd tîm galwedigaethau eich esgobaeth yn gweithio’n agos gyda chi, gan ddefnyddio’r rhinweddau dirnad i arwain y broses. Bydd y rhinweddau hyn yn destun archwilio manwl gan y naill ochr a’r llall. Mae dogfen yn manylu ar y rhinweddau hyn ar gael yma:

• Rhinweddau Dirnad ar gyfer Gweinidogaeth Leyg Drwyddedig (PDF)

Os yw rhai o’r rhinweddau hyn yn teimlo’n anghyfarwydd i ddechrau, peidiwch â phoeni – bydd eich tîm galwedigaethau yn eich arwain drwy’r broses ddirnad ac yn eich cefnogi bob cam o’r ffordd.

Pan fyddwch yn barod, bydd yr esgob yn eich gwahodd i banel dirnad esgobaethol, proses ddirnad sy’n rhoi ystyriaeth weddigar i’ch galwad a’ch addasrwydd ar gyfer hyfforddiant fel gweinidog lleyg trwyddedig.

Os mai dyna’r argymhelliad, byddwch yn hyfforddi drwy Athrofa Padarn Sant. Ar ôl cwblhau’ch ffurfiant a’ch hyfforddiant cychwynnol, cewch eich trwyddedu gan eich esgob fel gweinidog lleyg trwyddedig.

Am ragor o wybodaeth am hyfforddi mewn coleg diwinyddol, gweler gwefan Padarn Sant: