Canllawiau ar Grefydd, Gwerthoedd a Moeseg

Mae gan Gymru ddiwylliant cyfoethog ac unigryw gyda'i hiaith, ei harferion, ei gwyliau, ei cherddoriaeth a'i gwleidyddiaeth ei hun. Mae'n ddiwylliant lle mae llawer o safbwyntiau amrywiol yn cydfodoli mewn cymdeithas sydd wedi'i rhwymo gan werthoedd cyffredin democratiaeth a rheolaeth y gyfraith. Mae'r amrywiaeth hon yn creu cymdeithas ddeinamig a bywiog, sy'n adlewyrchu’r Gymru gyfoes, lle caiff credoau cymdeithasol, diwylliannol, crefyddol ac ysbrydol o bob math eu pwyso a’u mesur, a’r rhai sy’n eu harddel eu trin â pharch ac yn gyfartal.

Mae dathlu a thanategu’r amrywiaeth hon yn hanfodol i ethos ysgolion yr Eglwys yng Nghymru, ac mae angen ei hymgorffori ym mhob agwedd ar y cwricwlwm drwy brofiadau dysgu cyfoethog. Trwy gydol ei hanes, mae Cymru wedi croesawu pobl sy’n arddel crefyddau gwahanol ac sy'n dod o ddiwylliannau gwahanol, a thrwy addysgu pwnc crefydd, gwerthoedd a moeseg, mae'r Eglwys yng Nghymru yn cefnogi dull gweithredu sy'n hyrwyddo dealltwriaeth a pharch tuag at bob crefydd, credo a bydolygon anghrefyddol, gan adlewyrchu'r amrywiaeth sy'n bodoli yng nghymdeithas flaengar Cymru.

Mae ein dull gweithredu yn dathlu addysg greadigol, dosturiol sy'n croesawu ac yn grymuso, gan sicrhau bod plant a phobl ifanc yn cael eu cefnogi i ymgysylltu â materion "pwrpas, ffydd a chred" gan gyflawni eu rolau fel aelodau gwerthfawr o gymdeithas sy'n barod i gymryd rhan lawn mewn bywyd a gwaith fel dinasyddion moesegol, gwybodus Cymru a'r byd.

Mae modd defnyddio is-lensys i edrych ar gysyniadau Crefydd, Gwerthoedd a Moeseg, a'u harchwilio. Maen nhw'n gydgysylltiedig ac ni fwriedir iddyn nhw fod yn unedau nac yn destunau. Mae'r is-lensys yn cyd-fynd â chanllawiau Llywodraeth Cymru ac maen nhw’n cynnig cyfleoedd ychwanegol i ysgolion yr Eglwys yng Nghymru hefyd.

Caiff ein hadnoddau ychwanegol a'n dolenni eu harchwilio i sicrhau eu bod yn cefnogi canllawiau'r Eglwys yng Nghymru ar gyfer datblygu'r cwricwlwm.

Daw dyfyniadau'r Beibl o'r Beibl Cymraeg Newydd Diwygiedig 2004.