Angladdau

Mae trefnu angladd yn gallu bod yn anodd a heriol iawn, yn enwedig pan fyddwch chi’n ffarwelio â rhywun sydd wedi bod yn rhan fawr o’ch bywyd. Mae’r Eglwys yng Nghymru yma i’ch helpu a’ch cefnogi chi, nid yn unig wrth gynllunio’r gwasanaeth angladd ei hun, ond cyhyd ag y byddwch chi ein hangen ni wedyn.

Mae Cristnogion yn credu bod pob unigolyn wedi’i greu’n unigryw ar lun a delw Duw, ac rydym yn deall bod angen i angladd adlewyrchu popeth a oedd yn arbennig am y person roeddech chi’n ei adnabod a’i garu, waeth a yw’r gwasanaeth yn cael ei gynnal mewn eglwys, amlosgfa neu fynwent.

Er gwaethaf y teimladau cryf o golled a galar rydym yn eu profi pan fydd un o’n hanwyliaid yn marw, bydd yr Eglwys yng Nghymru bob amser yn adlewyrchu’r gobaith a’r cysur mawr sy’n sail i’r ffydd Gristnogol. Mae hyn yn rhoi sicrwydd i ni fod yna fwy na’r bywyd hwn yn unig, a thrwy Efengyl Iesu Grist, mae Duw yn addo lle i ni heb farwolaeth, dagrau na thristwch mwyach.

Mae pob person yn unigryw a dylai pob angladd fod yn unigryw hefyd. Bydd gweinidog yr eglwys, a elwir yn ficer yn aml, yn eich annog i siarad am y person rydych am ddiolch amdano a’r bywyd rydych am ei ddathlu. Gall eich helpu chi i gynllunio’r gwasanaeth, a thrafod beth sy’n bosibl gyda chi.

Mae yna sawl ffordd y gallwch chi wneud yr angladd yn wirioneddol bersonol: yr hyn sy’n cael ei ddweud am eich anwylyd, beth hoffech chi i bobl ei wisgo, y gerddoriaeth sy’n cael ei chwarae, y darlleniadau a ddewisir, y gweddïau a offrymir, neu efallai’r llun a ddewisir o’r unigolyn i’w roi yn y blaen.