Eglwys yn cymeradwyo gwasanaeth bendithio ar gyfer partneriaethau o’r un rhyw
![](https://churchinwales.contentfiles.net/media/images/Bishop_Gregory_Cameron.width-1200.jpg)
Bydd cyplau o’r un rhyw yn gallu derbyn bendith ar eu partneriaeth sifil neu briodas yn eglwysi yr Eglwys yng Nghymru am y tro cyntaf ar ôl i ddeddfwriaeth newydd gael ei phasio heddiw (Medi 6).
Cymeradwywyd Bil i awdurdodi gwasanaeth o fendith gan aelodau Corff Llywodraethol yr Eglwys yn ei gyfarfod. Fe’i pasiwyd gan y mwyafrif angenrheidiol o ddwy ran o dair ym mhob urdd o’r tri – Esgobion, clerigion a lleygwyr.
Defnyddir y gwasanaeth yn arbrofol am bum mlynedd a mater i glerigion unigol fydd penderfynu a ydynt am ei arwain ai peidio.
Mae’r gwasanaeth am fendith yn unig gan nad yw cyplau o’r un rhyw yn gallu priodi yn yr eglwys.
Cyflwynwyd y Bil gan yr Esgobion, yn dilyn arwydd gan aelodau’r Corff Llywodraethol ei bod yn “fugeiliol anghynaladwy” i’r Eglwys beidio gwneud unrhyw ddarpariaeth ffurfiol ar gyfer y rhai sydd mewn perthnasoedd un rhyw ymroddedig.
Wrth ymateb i’r bleidlais, dywedodd Esgob Llanelwy, Gregory Cameron, a gyflwynodd y Bil, “Rwyf ar derfyn y ddadl hon heb unrhyw ymdeimlad o fuddugoliaeth ond gan gredu bod yr Eglwys yng Nghymru wedi gwneud y peth iawn o dan law Dduw dros y gymuned LGBTQIA+. Mae’r Eglwys wedi datgan yn bendant heddiw o blaid bendithion.
Mae taith i’w chymryd o hyd ond gobeithio y gallwn ei theithio ynghyd â phawb o bob rhan o’r Eglwys.”
Pasiodd yr Esgobion y Bil yn unfrydol, pasiodd y clerigion ef o 28 i 12 gyda dau yn ymatal a phasiodd y lleygwyr o 49 i 10 gydag un ymatal.
Cynhaliwyd y drafodaeth a’r bleidlais ar ddiwrnod cyntaf cyfarfod y Corff Llywodraethol yng Nghanolfan Confensiwn Rhyngwladol Cymru yng Nghasnewydd. Bydd ail ddiwrnod y cyfarfod yn cael ei gynnal ar-lein yn unig, trwy Zoom, ddydd Mercher, Medi 8 a bydd hefyd yn cael ei ffrydio’n fyw.