Galwad Lambeth ar Urddas Dynol – Datganiad yr Archesgob
![](https://churchinwales.contentfiles.net/media/images/Andrew_John.width-1200.jpg)
Mae Archesgob Cymru heddiw (2 Awst) wedi cadarnhau Galwad Cynhadledd Lambeth yn cadarnhau urddas pob unigolyn.
Mewn datganiad, dywedodd yr Archesgob Andrew John na fyddai byth yn cilio ymaith o wrthwynebu gwahaniaethu yn erbyn pobl ar sail eu rhywioldeb a’u hunaniaeth rhywedd ond ei fod yn parhau’n ymroddedig i wrando a chyd-gerdded gyda’r rhai yn y Cymun Anglicanaidd sy’n anghytuno gydag ef.
Mae’r datganiad llawn yn dilyn.
Canmolodd yr Archesgob Andrew hefyd lythyr a gyhoeddwyd i bob esgob gan Archesgob Caergaint cyn y drafodaeth am gael effaith unedig ar y Gynhadledd. I gael mwy o wybodaeth am y drafodaeth a geiriad llythyr yr Archesgob Justin gweler:
Datganiad Archesgob Cymru
Duw cariad yw! Mae’r cariad hwn a ddatgelwyd gan yr Iesu, a ddisgrifiwyd yn yr Ysgrythurau ac a ddatganwyd yr Eglwys, yn Newyddion Da i bawb, yn ddieithriad. Mae’r Beibl yn ein haddysgu fod pobl LGBT+ yn rhan werthfawr o gread Duw, gan fod pob un ohonom yn “ofnadwy a rhyfeddol” (Salm 139.14) a chaiff pob un ohonom ein caru’n gyfartal. Rwy’n croesawu Galwad Lambeth yn cadarnhau urddas pob unigolyn.
Rwy’n cydnabod y cafodd llawer o bobl LGBT+ eu brifo gan yr Eglwys drwy gydol hanes, a hefyd gan ddigwyddiadau’r ychydig wythnosau diwethaf. Rwy’n dymuno cadarnhau sancteiddrwydd eu cariad at ei gilydd mewn perthnasoedd ymroddedig.
Ymrwymaf i weithio gyda’n cyfeillion yng Nghrist ar draws y Cymun i wrando ar eu straeon a deall eu cyd-destunau, sy’n amrywio’n fawr. Ni fyddaf byth yn cilio ymaith rhag gwrthwynebu gwahaniaethu a rhagfarn yn erbyn plant Duw ar sail eu rhywioldeb a’u hunaniaeth rhywedd.
Gyda’n gilydd, byddwn yn datgan iachâd a gobaith Crist i’n byd drylliedig a gweddïo am y dydd pan fydd yr Eglwys yn gwirioneddol groesawu, gwerthfawrogi a chadarnhau holl bobl Duw. Gydag esgobion y Cymun, rwy’n parhau’n ymroddedig i wrando a cherdded gyda’n gilydd er ein anghytundeb ar y mater hwn.
+Andrew Cambrensis