Prosiect Wonder of Wellbeing yn dathlu grant o £750k

Mae prosiect sy'n cysylltu pobl â thangnefedd a phresenoldeb Duw yn ardal Gŵyr a'i heglwysi hanesyddol wedi cael mwy na £750k ar ôl blwyddyn beilot lwyddiannus.

Lansiwyd prosiect Wonder of Wellbeing Gower fis Chwefror diwethaf ac mae wedi profi’n boblogaidd, gyda gweithgareddau'n amrywio o'r Eglwys Wyllt a gweithio gydag ysgolion lleol i weithio mewn partneriaeth â Faith in Families i ddarparu sesiynau lles yn ystod gwyliau'r haf.

Mae’r prosiect bellach wedi derbyn grant o £763,278 gan Gronfa Twf yr Eglwys yng Nghymru dros y pum mlynedd nesaf, i ehangu ei gwaith a thyfu ei gynulleidfa yn fwy.

Dywedodd y Parchedig Peter Lewis, arweinydd Ardal Weinidogaeth Gŵyr: "Cafwyd ymateb cadarnhaol i'n cais gan yr Eglwys yng Nghymru ac mae hwn yn gyfnod cyffrous iawn i ni. Dwi'n meddwl y bydd Gŵyr yn lle gwahanol mewn pum mlynedd os ydy popeth yn gweithio'n dda."

Bydd y grant yn cynnwys tair swydd llawn amser – arweinydd prosiect, caplan ac ymarferydd creadigol - ac mae'n dilyn dyfarniad gwahanol o £2.8m i Eglwys y Santes Fair yn Abertawe wrth iddi ddod yn eglwys mwyswyr (Minster) gyntaf Cymru.

"Mae gennym 16 adeilad eglwysig canoloesol yn ein hardal weinidogaeth a bydd llawer o waith y capel yn ymwneud â thwristiaeth ysbrydol, cysylltu â phererinion a hefyd datblygu cymuned ar-lein o bobl sy'n cysylltu â'r prosiect, ond sy'n byw ymhellach i ffwrdd. Felly bydd cyfle i dyfu ffydd pobl a disgyblion ar-lein," meddai Peter.

"Bydd arweinydd y prosiect yn cydlynu popeth o ddydd i ddydd ac mae'r swydd arall ar gyfer ymarferydd creadigol, i gynllunio a chyflwyno sesiynau lles yn seiliedig ar greadigrwydd a'r awyr agored."

Bydd Chloe Thomas yn parhau fel ymarferydd creadigol, ar ôl bod ynglyn â'r prosiect o'r cychwyn cyntaf, a'r gobaith yw y bydd aelodau eraill y tîm yn eu lle ym mis Mai.

"Am yr 11 mis cyntaf roedd Chloe yn llenwi pob un o'r tair rôl gyda'i gilydd," meddai Peter. "Rydyn ni wedi ystyried yn ddwys yr hyn sydd ei angen i ddatblygu'r prosiect mewn ffordd gynaliadwy a dyna pam rydyn ni wedi creu'r tair rôl wahanol. Fe wnaethon ni sylweddoli bod angen i ni roi amser cyfartal i bopeth."

Yn ystod y flwyddyn ddiwethaf, mae'r prosiect wedi gweithio gydag ysgolion lleol ar brosiectau sydd â'r nod o hybu lles disgyblion ac wedi cynnal sesiynau ar glybiau gwyliau traeth Oxwich ar gyfer Ffydd mewn Teuluoedd.

"Fe greodd Chloe adnodd o'r enw Shine Bright, sy'n gwrs lles saith sesiwn. Gofynnodd Ysgol Gynradd Knelston i ni a allem roi rhywbeth at ei gilydd i helpu plant i deimlo mwy

o'u hunanwerth ac rydym wedi bod yn cyflawni hynny nawr yn yr ysgol. Mae Chloe hefyd wedi hyfforddi wyth person arall, rhai ohonynt o ardal Abertawe, er mwyn iddynt gyflawni hynny yn eu hysgol leol.

"Byddwn hefyd yn tyfu ein cysylltiadau â Faith in Families, ac eleni byddwn yn datblygu sesiynau ar eu cyfer yn Abertawe, yn ogystal â dod â nhw i lawr i Benrhyn Gŵyr."

Mae hefyd wedi dechrau Eglwys Wyllt sydd, meddai Peter, yn tyfu i fod yn gynulleidfa yn ei hawl ei hun.

"Mae Eglwys Wyllt bron iawn wedi dod yn gymuned addoli newydd. Maen nhw'n cyfarfod bob mis nawr ac rydyn ni'n dechrau gweld y prosiect hwn fel patrwm o sut rydyn ni'n gwneud pethau.

"Nid yw llawer o'r bobl yma yn eglwyswyr, felly mae'n datblygu cynulleidfa newydd."